Informashon di bishíta

Konsulta ku e speshalista.

Un speshalista médiko ta duna bo informashon tokante bo malesa òf kondishon. E ta proponé algun tèst, un tratamentu òf operashon i ta papia tokante remedinan, e ta preskribí remedi i indiká nan efektonan sekundario (side effects). Huntu ku bo speshalista bo ta disidí pa kua tèst i/òf tratamentu bo ta opta. Pa bo por hasi esei, ta importante ku bo tin e informashon korekto i ku e ta komprendibel.

Tep pa prepará bo mes riba e konsulta

Promé ku e konsulta

• Sa adelantá kiko bo ke bisa bo speshalista. Splika bo pregunta/keho bon. Pa asina tambe ta kla pa bo speshalista kiko ta mas mihó pa hasi.
• Pensa adelantá kiko bo ke sa i skirbi bo preguntanan riba un papel, pa bo no lubida nada.
• Bin ku un hende di konfiansa. E por yuda bo papia i skucha. Dos hende ta tende mas ku un.

Durante e konsulta

• Puntra ora bo no komprende algu, por ehempel nòmber/término médiko.
• No hasi bo preguntanan te na final, nèt promé ku bo tin ku bai.
• Puntra si tin foyete òf wèpsait (website) tokante bo kondishon, tèst i/òf tratamentu. Por puntra tambe si tin un organisashon pa pashènt ku mes un kondishon ku bo.
• Na final di e konsulta resumí e puntonan prinsipal di e kombersashon. Por ehempel: "Dòkter a bisa ku...?" Asina bo por chèk si bo a kompronde tur kos bon.