Brònkoskopia

Ta un saminashon di e via respiratorio pa detektá inflamashon òf otro iregularidatnan. Den bo kurpa tin un pipa prinsipal ku ta hala rosea dor di dje, ku yama trákea. E ta dividí su mes den hopi ramanan. Un rama ta un bronko (bronchus). Pa hasi un bronkoskopia ta pasa un tubo ku un kámara na final via di bo boka, pa wak e bronkonan di paden. Bo por hala rosea normal. Henter e saminashon ku poskuido inkluí, ta dura mas o menos dos ora.

Preparashon

Durante e 6 ora promé ku bo sita, bo no mag di kome nada i for di 4 ora promé ku bo sita no mag di bebe nada. Remedinan ku bo tin ku tuma mainta, bo por tuma ku menos awa posibel. Den kaso ku bo sita ta atardi, bo por tuma un desayuno leve (6 ora anterior). Un desayuno leve ta un kòpi té ku un buskuchi. Nos ta supliká pa personanan ku ta kompaña bo, keda warda den e sala di espera, na moda ku e saminashon ta bai mas lihé posibel.

Saminashon

Promé ta nesesario pa fèrdof bo garganta pa bo no tosa ora e tubo pasa paden. Ta ferdof riba dos manera. Promé e médiko òf laborant ta laga bo inhalá un damp via di bo boka pa 15 minüt. Despues ta ferdof bo boka i garganta. E spré tin un smak marga i ta duna bo e sintimentu ku e garganta ta diki di paden i e gulimentu ta bai mas difísil. Despues tin ku warda un ratu pa e fèrdof kuminsa traha. E proseso ta dura mas o menos 45 minüt.

Kon ta hinka e bronkoskop

Ora ta asina leu pa hinka e tubo (bronkoskop), bo ta tuma asiento riba un kama di saminashon òf un stul. Bo ta haña un pènchi riba un dede. E ta midi e porsentahe di oksígeno den bo sanger (saturashon). Ta posibel ku bo mester di un tiki oksígeno durante e saminashon. Awor un dòkter ta hinka e tubo dor di bo boka of nanishi i ta mand'é den bo via respiratorio. Bo por sinti bo mes anshá, pero no prekupá pasobra bo via respiratorio ta kuater bes mas hanchu ku e tubo. Asina bo por hala rosea normal durante e saminashon. Durante e saminashon dòkter por añadi anestesia pa bo no tosa hopi.Ta kologá un tubo na bo nanishi. No spanta di esei, ta solamente pa bo tin menos inkomodidat posibel durante e saminashon.

Biopsia i kultivo (kweek)

Pareu ku dòkter ta wak e paden di bo via respiratorio, bo tambe por wak riba pantaya. Tin biaha ta chupa un tiki slèim dor di e tubo pa hasi un kultivo pa wak si tin bakterianan den bo sleim. Duranta e saminashon tambe por korta un pida tehido, lokual ta yama un biopsia. Den laboratorio ta analisá e karakter di e tehido. Si despues bo ta tosa un tiki sanger, no ta peligroso. Ta dor di e biopsia.

Resultado

E resultado di e bronkoskopia bo ta tende e siguiente biaha ku bo bishitá bo speshalista di pulmòn.