Ekokardiografia di kurason

Pa medio di sonido ku frekuensha haltu un ekokardiografista por wak di pafo kon bo kurason i su klèpnan ta funshoná. Por traha video, saka pòrtrèt i hasi kalkulashonnan di e imagennan. E tèst di eko no ta hasi doló.

Preparashon: No ta nesesario.

Saminashon

Bo tin ku kita paña parti ariba i drumi pechu ariba riba un kama di saminashon.

E ekokardiografista ta pega tres elektródonan di ECG pa monitor e rítmo di bo kurason.

Despues ta bira riba banda robes i e ekokardiografista ta apliká un poko gel friu.

E ta kuminsa move un transdiuser mei mei bo repchinan. Asina e ta haña un imagen bibu di bo kurason parti paden.

Ta wak kon bo kurason ta kontraé i kon e fluho di sanger ta. E tèst ta dura 20 pa 30 minüt.

E ekografista ta tene bo na altura di kiko e ta hasi i bo por hasi’é pregunta tambe. Ora e tèst ta kla ta kita e gel for di bo pechu i por bisti paña.

Resultado

Bo ta risibí e resultado di e dòkter ku a pidi e tèst. E ekokardiografista por yama bo dòkter pa bin wak. Bo dòkter por duna mas instrukshon e momento ei.