Registrashon di Hòlter-ECG 24 òf 48 ora

Durante un saminashon di hòlter ta graba e ritmo di kurason den bida diario pa 24 òf 48 ora riba un rikòrder, mientras bo vida diario ta sigi normal. E tèst no tin riesgo di peliger i no ta hasi doló.

E kurason ta un múskulo ku ta kontené kuater kompartimentu bashí, kaminda bo sanger ta pasa. Dor di kontrakshonnan di e spir, sanger ta wòrdu di pòmp dor di e kurason den e adernan di bo kurpa. E kurason por kontraé dor di koriente ku e mes ta generá. E kurason ta kontraé semper bai den mesun sekuensha. Promé e dos auríkulanan parti ariba (atrio), sigí pa e skòt di separashon i pa último e dos kambernan abou (fentrikulo).

Kada fase tin su mes parti den henter e siñal di koriente durante un siklo di pòmp. Ta registrá e siñal di koriente pa medio di e elektródonan ku e laborant ta pega na sierto kaminda riba bo pechu. Asina e siñal por bira visibel riba pantaya i/òf papel, lokual ta yama un registrashon di hòlter.

Preparashon

Bisti un shùrt/blusa komfortabel ku ta sera haltu, asina ei e elektródonan ku nan waya no ta visibel. Feita kabei di pechu eksesivo pa e elektródonan keda bon pegá. E laborant ta limpia e kamindanan ku ta pega e elektródonan ku alkohòl.

Saminashon

Yega un kwart’i ora promé ku bo sita pa e kurpa freska. Ora e laborant yamá bo, bo tin ku kita bo paña parti ariba i sinta riba un kama di saminashon òf stul. Un laborant ta pega très elektródonan riba bo pechu i ta konektá e wayanan ku e aparato di graba ("holterkastje"). No tin koriente riba e elektródonan. E preparashonnan ta dura mas o menos 15 minüt.

Bai kas

Despues di pega e aparato bo ta bisti bo paña bèk. E rikòrder di hòlter ta keda kologá den un tas chikítu na bo garganta. Promé ku bo bai kas, e laborant ta duna bo un diario pa bo nota tur bo aktividatnan aden durante ku bo tin e hòlter bistí. Bo tin ku nota e ora, durashon i deskripshon di e aktividat, por ehèmpel 7.00 – 7.30: lanta i bisti paña/ 7.30-8.00: kana pafo/ 8-00-9.00: desayuná i lesa korànt, etc. Hasi tur lokual bo sa hasi normalmente. Ora bo ta bai drumi tambe keda ku e rikòrder bistí.

No ta permití

No ta permití pa muha e aparato i su elektródonan. Esei por stroba e registrashon. Anto no por baña ni landa. Refreská kurpa na kranchi.

Remedi

Si bo ta usa remedi diariamente, por tuma nan normal, basta bo dòkter no a palabrá algu otro ku bo.

Ki ta hasi despues ku e 24/48 ora di registrashon a pasa

Despues di 24 ora bo mes por kita e aparato i tres’é bèk pa nos, huntu ku e lista ku notifikashonnan.

Resultado

Bo ta risibí e resultado despues serka e speshalista ku a pidi e tèst. Un laborant no tin pèrmit pa duna resultado.