Saminashon di kapasidat di pulmòn (Spirometria)

Tin diferente manera pa saminá kon e pulmonnan ta traha. Ta dependé di bo kehonan i nan posibel kousa kua tèst bo ta bai hasi. Por hasi mas tèst pareu tambe. Tin spirometria, bòdibòks, 'diffusietest' i tèst di probokashon ku histamina. E saminashonnan no ta hasi doló. No tin nodi di hasi hopi esfuerso físiko.

Preparashon

Por kome i bebe normal. Yega un kwart’i ora promé ku bo sita. Pa e saminashon sali eksitoso bo mester ta mas relahá posibel.

Kua remedi tin ku stòp di tuma?

Pa e tèstnan por logra bon, bo tin ku stòp di tuma sierto remedi pa 12 òf 24 ora. Ora ta traha sita, ta palabrá kua di e remedinan. Remedi ku no ta pa pulmon por keda tuma normal promé ku e tèst. Den kaso bo ta sinti hopi malu sin un di bo remedinan pa pulmon, tum’é normal i bisa e asistènt promé ku bo kuminsá e tèst.

Remedinan pa stòp di usa durante 24 ora promé ku e saminashon ta: • Foradil® • Foster® • Oxis® • Serevent® • Spiriva® • Theolair®

Remedinan pa stòp di usa durante 12 ora promé ku e saminashon ta: • Atrovent® • Berodual® • Berotec® • Bricanyl® • Combivent® • Salbutamol • Ventolin®

Remedinan ku por keda tuma normal ta:

Becloforte® • Becotide® • Flixotide® • Pulmicort® • DAF® • Hydrocortison® • Prednison®

Saminashon

Pa kada tèst di funshòn di pulmòn bo ta tuma e boka di e aparato den bo boka. Ta haña un penchi riba nanishi pa no hala rosea dor di bo nanishi. E tèst ta dura 30 minüt pa un ora.

Spirometria

Ku e tèst aki ta midi kuantu airu bo por hala aden i saka afo ora bo ta hala rosea trankil i ora bo ta hala rosea profundo. Ta midi e velosidat di ekspirashon tambe. Pa esaki bo tin ku hala rosea aden i afo un par di biaha, ku hopi forsa.