Tèst di alergénonan di kueru

Un reakshon alérgiko ta un reakshon violento di e kurpa riba un supstansha ku normal no ta forma un peliger p’é. E supstansha ku ta kousa un reakshon alérgiko ta yama un alérgeno. Alérgeno bo ta haña den airu, kuminda, remedinan, venenu di insektonan, pero també den produktonan pa kuido di kurpa òf perfume.

Pakíko ta hasi un tèst di kueru?

Bo ta hasi e tèst di kueru pa wak ku bo ta sensibel pa sierto alérgenonan. Dor di inyektá alérgenonan nèt bou di bo kueru, bo por kousa un reakson alérgiko chikí. Si bo ta sensibel pa un alérgeno, por mira un hinchá después di 15 pa 20 minüt ku un área korá rondó di dje.

Kiko e tèst ta enserá?

Ta inyektá un tiki (0,03 ml) líkido ku alérgenonan nèt bou di bo kueru. Prinsipalmente ta hasi e tèst pa wak si un persona tin un alergia pa remedi, venenu di insekto i pa supstanshanan ku e por inhalá.

Posibel reakshonnan riba e tèst di kueru

Si bo ta sensibel pa un alérgeno, por mira un hinchá ku un área korá rondó di dje. E por grawatá. Ta dura 1 pa 2 ora pa e hinchá kita. Si e reakshon ta mas severo un hinchá por bini bèk riba mes un lugá después di 6 ora i ta disparsé su siguiente dia. Un reakson alérgiko hopi fuerte di henter bo kurpa no lo tuma lugá kasi nunka, dor ku ta inyektá solamente un kantidat chikitu di un alérgeno. A kaso bo ta sinti bo mester tosa, nister, haña wowo kòrá ku ta grawatá, òf ta bira hanshá, mester atvertí e laborant pa dòkter por duna bo remedi.

Si bo sa kai flou ora ta prek sanger, avisá adelantá pa nan buta bo drumi riba e kama di saminashon promé ku ta kuminsá hasi e tèst.

Ora e tèst a kaba, bo por sigi bo aktividatnan normal.

Mester stòp siguiente remedinan 24 ora promé ku e tèst

Remedi pa alergia: Montelukast, Singular
Remedi kontra malesa di moveshon: Cinnarizine
Remedi kontra biramentu di kabes: Betasere